BE mund të ketë caktuar një datë për valën e re të zgjerimit – Afat me kusht për anëtarësimin e Ballkanit Perëndimor
Bashkimi Europian po përgatitet të zotohet mbi afatin e ri të valës së radhës të zgjerimit. Sipas një dokumenti të cituar nga “EUObserver”, data pritet të miratohet nga Komisioni Europian në një letër strategjike më 14 Shkurt.
“Partnerët e Ballkanit Perëndimor tani kanë një dritare historike mundësie. Për herë të parë, perspektiva e tyre e aderimit ka një afat kohor pozitiv”, shkruhet në draft.
Por, afati kohor i përmendur nuk mund të respektohet pa u plotësuar disa kushte nga vendet e Ballkanit.
“Me një vullnet të fortë politik, realizimin e reformave reale dhe zgjidhjen afatgjatë të zënkave me fqinjët, Mali i Zi dhe Serbia duhet të jenë gati për anëtarësim brenda vitit 2025”.
Në letër gjithashtu thuhet se Shqipëria, Bosnje Hercegovina, Maqedonia dhe Kosova deri në atë kohë duhet të jenë në një rrugë të mbarë drejt integrimit europian, ose të paktën faza e negociatave të jetë goxha e përparuar.
Shqipëria dhe Maqedonia pritet të hapin këtë vit negociatat për anëtarësim, nëse Maqedonia arrin të zgjidhe debatin për emrin me Greqinë. Ndërsa për Malin e Zi dhe Serbinë, disa kapituj janë mbyllur, ndërsa pritet punë për fushat e tjera.
Bosnja dhe Hercegovina po përpiqet që të fitojë statusin e kandidatit nga BE, ndërsa Kosova po mendon të kërkojë zyrtarisht të quhet një vend kandidat.
Por që i gjithë procesi të ecë pozitivisht për Ballkanin Perëndimor, Europa kërkon që të zgjidhjen çështje si përcaktimi i kufijve tokësorë dhe detarë mes vendeve, njohja e Kosovës nga Serbia, çështja e emrit të Maqedonisë, etj.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.