Mungesa e mjekëve – Rama: 10 mijë lekë në ditë për specialistët që shkojnë në rrethe
Për të nxitur mjekët specialistë që të shkojnë në rrethe do të ketë dyfishim të bonusit të vendosur më parë.
Ndërkohë që një tjetër motivim financiar për mjekët specialistë do të jetë edhe pagesa e 10 mijë lekëve në ditë për konsultat e realizuar në rrethe.
Këto dy risi i ka prezantuar kryeministri Edi Rama gjatë prezantimeve të projekteve për QSUT-në. Rama ka theksuar se korrupsioni në shëndetësi do të luftohet vetëm duke ndryshuar sistemin.
Një nga mënyrat sipas tij është edhe rritja e pagave të bluzave të bardha, një rritje me 25% do të jetë për personelin e urgjencave dhe reanimacionit, dyfishim të pagës do të kenë mjekët e rojës si dhe një rritje me 10% do të përfitojë personeli tjetër.
Sipas kreut të qeverisë janë rritur me 30% shpenzimet për shëndetësinë. Shifra e 500 milionë euro është një shifër shumë e lartë për vendin tonë dhe për këtë arsye duhet që të përdoret në mënyrën më të mirë të mundshme për të ndryshuar shëndetësinë në vend.
Ndryshimet rrënjësore në infrastrukturë , pajisja me aparaturat e duhura mjekësore si dhe furnizimi në kohë me barna do të jetë ndryshimi i radhës , sipas Ramës.
Entela Barjamaj/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.