Mungojnë 216 milionë euro në arkë – TVSH-ja i “bën gropën” buxhetit, TAP-i merr meritat
Vitin që lamë pas arka e shtetit është mbyllur me rreth 26.3 miliardë lekë apo 216 milionë euro më pak se sa ishte planifikuar në fillim të vitit. Sipas treguesve fiskale të të publikuar nga Ministria e financave, gjatë vitit 2019 janë mbledhur afro 460.4 miliardë lekë nga 486.6 që ishte plani, ndërsa në raport me vitin 2018 ka një rritje prej 10.5 miliardë lekë.
Peshën më të madhe në mungesë të të ardhurave e zënë ato tatimore me afro 22 miliardë lekë minus. Perfomanca e dobët në mbledhjen e të ardhurave muaj pas muaji si dhe efekti tërmet, kanë sjellë këtë rezultat jo pozitiv për financat publike.
Gropën më të madhe në buxhet duket se e ka shkaktuar TVSH-ja, me minus 18.9 miliardë lekë, ku në total janë mbledhur 132.4 miliardë lekë. Kjo për shkak të rënies së eksportit të energjisë, përjashtimi nga TVSH i nënkontraktuesve të projektit TAP si dhe luhatjet e kursit të këmbimit. Megjithatë të ardhurat nga TVSH janë edhe tregues kryesorë të konsumit në ekonomi.
Me mungesë të konsiderueshme nga planifikimi, prej 4.8 miliardë lekësh paraqiten të ardhurat nga taksat nacionale dhe të tjera, pasi janë mbledhur 36.4 miliadrë lekë si dhe akzica me minus 1.6 miliardë lekë. Po ashtu edhe pushteti vendor ka mbyllur një vit të vështirë pasi rezulton me minus 2.6 miliardë lekë në krahasim me planifikimin.
Ndërkaq, Tatimi mbi fitimin ka pasur perfomancë pozitive, ku janë mbledhur 3 miliardë lekë mbi planin dhe në total, rreth 36.6, miliardë lekë.
Ndërkaq, Tatimi mbi të ardhurat personale është zëri kryesor që ka ndikuar ndjeshëm në rritjen e të ardhurave, ku janë vjelur 46.1 miliardë lekë, apo 4.2 miliardë lekë më shumë se sa ishte planifikuar.
Sa i takon shpenzimeve kapitale, janë disbursuar afro 75 miliardë lekë, apo rreth 87 për qind e fondit total, duke bërë që 11.1 miliardë lekë të mbeten të papërdorura. Lidhur me këto tregues ka reaguar edhe përfaqësuesi i Partisë Demokratike, Dorian Telitit, i cili e konsideron këtë performancë si rrjedhojë korrupsioni dhe paaftësie.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.