Mungojnë gjyqtarët, shteti kursen 2 milion USD paga – KLGJ: Zëri shpenzime personeli u shkurtua me rreth 500 milionë lekë nga buxheti fillestar

Ndërsa me pagat e reja gjyqtarët paguhen rreth 3 mijë euro në muaj, kursimi në arkën e shtetit është i vetmi lajm i mirë prej shkarkimeve të shumta që prej vitit 2021. Këshilli i Lartrë Gjyqësor raporton se janë kursyer rreth 2 milionë dollarë shpenzime personeli gjatë vitit që sapo lamë pas në zërin shpenzime personeli. Në një kohë që arrin ne rreth 5 milionë dollarë shkurtimi i këtij zëri në raport me buxhetin fillestar të KLGJ, i rishkuar për shkak të Pandemisë Covid 19.

Në shpenzime personeli buxheti vjetor i alokuar në fillim të vitit për këtë program ishte 2,5 miliardë lekë, afërisht 25 milionë dollarë. KLGJ raporton se Fondi i akorduar në këtë artikull perveç rishikimit të tij si rezultat i zbatimit të akteve normative të për shkak të Pandemisë, është rishikuar edhe brenda për brenda programit, si rezultat i nevojave emergjente të gjykatave.

Buxheti i rishikuar vjetor është 2,2 miliardë lekë. ndërsa realizimi faktik në shpenzime personeli është 2 miliardë lekë, ose në masën 93%.

Realizimi në këtë masë është i lidhur me mungesat në sistemin gjyqësor, thekson KLGJ. Numri i punonjësve të Sistemit Gjyqësor i miratuar me ligj për vitin 2021, është 1,679 punonjës, nga këto; 1,548 punonjës është organika e stafit gjyqësor, 125 janë punonjës të stafit të KLGJ-së dhe 6 është numri i punonjësve të QTI-së. Aktualisht në gjykata ka mungesa me 189 punonjës; nga të cilët 79 janë gjyqtarë dhe 110 janë punonjës të administrates, raporton KLGJ.

Diferenca e fortë në zërin shërbime personeli i dedikohet në masë të madhe pagave të munguara të gjyqtarëve dhe lidhet me hyrjen në fuqi të pagave të reja për gjyqtarët e prokurorët nga 1 janari i vitit 2019. Nëse më parë, paga mesatare për gjyqtarët dhe prokurorët shkonte nga 100 deri në 130 mijë lekë në muaj, pas 1 janarit 2019, paga mesatare kërceu në 280 deri në 380 mijë lekë në muaj.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.