Musk shet 5 miliard dollarë aksione të Tesla – Vendimi vjen pas sondazhit në Twitter ku ndjekësit votuan pro shitjes
Ekzekutivi i Tesla, Elon Musk, ka shitur rreth 5 miliardë dollarë në aksione, sipas formularëve të raportuara nga miliarderi, pak ditë pasi anketoi ndjekësit në Twitter për shitjen e 10% të aksioneve. Në shitjen e parë të aksioneve që prej vitit 2016, fondi i Musk shiti thuajse 3.6 milionë aksione të Tesla, me një vlerë prej rreth 4 miliardë dollarë, pasi shiti gjithashtu një seri tjetër prej 934,000 aksione për 1.1 miliardë dollarë, pasi ushtroi opsionin për të blerë thuajse 2.2 milionë aksione.
Totali prej 4.5 milionë aksione të shitura arrin në 3% të zotërimit që ai ka tek Tesla, që përbën pjesën më të madhe të pasurisë së tij prej 281.6 miliardë dollarë, sipas Forbes. Musk krijoi një sondazh në Twitter, ku pyeste ndjekësit nëse duhet të shesë 10% të aksioneve të tij, ç’ka solli rënien e vlerës së Tesla në bursë, pasi shumica votuan pro shitjes. Aksionet vazhduan rënien, me 12% ditën e Martë, në një shitje disa ditore që rrezikoi pozicionin e kompanisë në klubin e 1 trilionë dollarëve.
Shitja tjetër e aksioneve erdhi veçmas dhe i ofroi Musk rezerva në para cash’, duke qenë se pasuria e tij është kryesisht në formë aksionesh tek Tesla dhe SpaceX. Tesla është rritur me mbi 51% në vitin 2021, kryesisht falë një vrulli në Tetor, që u nxit nga një marrëveshje për të shitur 100,000 makina tek kompania e dhënies me qira, hertz.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.