Nafta Brent ngjitet të 123 dollarë për fuçi – BE arrin marrëveshje për të ndaluar importet e naftës nga Rusia

Nafta është rritur ndjeshëm në sesionin e sotëm, pasi liderët e Bashkimit Europian arritën një marrëveshje, të hënën vonë, për të ndaluar rreth 90% të importeve të naftës nga Rusia, deri në fund të këtij viti. Gjatë tregtisë aziatike, nafta bruto amerikane u rrit me rreth 3.5%, duke u ngjitur në mbi 119 dollarë, ndërsa Brenti i Londrës u rrit në mbi 123 dollarë për fuçi.

Në këtë mënyrë, marrëveshja zgjidhi ngërçin e krijuar, pasi Hungaria kishte bllokuar bisedimet. Hungaria ka një varësi të madhe nga nafta ruse, ndërsa udhëheqësi i këtij vendi, Viktor Orban, ka qenë mjaft miqësor me presidentin rus, Vladimir Putin. Charles Michel, president i Këshillit Europian, deklaroi se marrëveshja do të godasë menjëherë 75% të importeve të naftës nga Rusia.

Embargoja është pjesë e paketës së gjashtë të sanksioneve, që kur Rusia nisi pushtimin e Ukrainës në 24 shkurt. Këshilli Europian njoftoi se, në rast të ndërprerjeve të papritura të furnizimit, do të aplikohen masat e emergjencës për të garantuar siguri. Ndërsa presidentja e Komisionit Europian Ursula Von der Leyen shpjegoi se Hungaria, Sllovakia dhe Republika Çeke, që kanë një varësi të madhe nga nafta dhe gazi rus, janë përjashtuar përkohësisht nga marrëveshja derisa të gjejnë burime të tjera për të zëvendësuar naftën ruse. Rreth 36% e importeve të naftës në Bashkimin Europian vijnë nga Rusia.

Gjithashtu, në fokus të tregjeve është edhe takimi i OPEC+, që zhvillohet të enjten. Grupi pritet t’i përmbahet marrëveshjes së mëparshme për të rritur prodhimin me vetëm 432 mijë fuçi në ditë, gjatë korrikut, pavarësisht thirrjeve të vendeve perëndimore për të shtuar më shumë kuotat.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.