Nafta, drejt rritjes së 6-të radhazi javore – Tregtohet pozitive në sesionin e së Premtes prej tensioneve në ofertë
Nafta është rritur në tregtinë e fundit të Javës, duke i’u drejtuar javës së 6 radhazi të rritjeve, ndërkohë që shqetësimet mbi ofertën në treg po vazhdojnë. Nafta Brent, çmimi referencë në bursën e Londrës u rrit me 0.6% në 89.91 dollarë për fuçi, pasi preku 91.03 dollarë më herët gjatë tregtisë, që është niveli më i lartë që prej Tetorit 2014. Nafta bruto amerikane, u rrit me 0.6% në 87.15 dollarë për fuçi, pasi preku gjithashtu nivelin më të lartë në 7 vite prej 88.54 dollarë për fuçi.
Të dy kontratat kryesore në botë pritet të rriten për të 6-n javë radhazi, që është periudha më e gjatë e rritjes që prej Tetorit, ku nafta Brent u rrit më 7 javë dhe nafta bruto amerikane për 9. Deri më tani për vitin, çmimet kanë shtuar rreth 15%, prej tensioneve gjeopolitike mes Rusisë, prodhuesit të dytë më të madh në botë dhe Perëndimit, mbi mbledhjen e trupave në kufi me Ukrainën. Një tjetër presion në ofertë vjen nga kërcënimet në Emiratet e Bashkuara Arabe nga rebelët Houthi të Yemenit.
Pjesëmarrësit në treg janë përqendruar tek takimi i datës 2 Shkurt i Organizatës së Vendeve Eksportuese të Naftës, së bashku me aleatë si Rusia, një grup që njihet si OPEC+. Grupi nuk ka gjasa të devijojë nga planet për të rritur objektivin e prodhimit për Marsin, sipas burimeve për Reuters. Nga ana e ofertës, importet e naftës bruto në Kinë, që është importuesi më i madh në botë i naftës, mund të rimëkëmben me rreth 7% këtë vit, duke ndryshuar kursin e rënies së vitit 2021, ndërkohë që klientët po shtojnë blerjet për njësitë e reja të rafinimit, si dhe për të rimbushur inventarët e ulët.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.