Nafta e mbyll javën në rritje – Çmimet mbështeten nga Venezuela dhe luftimet në Libi

Çmimet e naftës i janë rikthyer fitimeve në sesionin e sotëm, për shkak të rënies së ndjeshme të furnizimit nga Venezuela.

Gjithashtu, edhe Libia me Iranit kanë mbështetur çmimet. Nafta Brent e Londrës po tregtohet në rreth 71.3 dollarë për fuçi, ndërsa nafta Bruto amerikane po tregtohet në rreth 64.1 dollarë për fuçi. Gjatë kësaj jave, dy bençmarkët kryesorë pritet të publikojnë fitime prej rreth 1.7%, ndërsa për naftën bruto kjo është java e gjashtë me radhë në rritje.

Analistët parashikojnë se tendenca e çmimeve do të jetë në rritje edhe gjatë tremujorit të dytë të këtij viti, për shkak se tregu vijon të tkurret. Gjatë 2019-ës, bençmarkët kryesorë janë rritur ne rreth 1/3 e vlerës, kryesisht për shkak të marrëveshjes së OPEC+ dhe Rusisë për të ulur prodhimin me rreth 1.2 milionë fuçi në ditë dhe nga sanksionet amerikane ndaj Iranit dhe Venezuelës.

Kreu i kompanisë shtetërore të naftës në Libi, paralajmëroi se luftimet në vend do të ndikojnë në rënien e prodhimit të naftës. Për këtë arsye, analistët parashikojnë një çmim mesatar të naftës Brent prej 75 dollarë për fuçi dhe për naftën bruto në 67 dollarë për pjesën e mbetur të vitit.

Për sa i përket kërkesës, pjesa më e madhe e rritjes së konsumit vjen nga Azia, ku rritja ekonomike në Kinë parashikohet të ngadalësohet në nivelin më të ulët në 30 vitet e fundit, pranë 6.2%.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.