Nafta e nis javën në rënie – Kostot e larta të energjisë dhe rritja e infeksioneve dobësojnë kërkesën
Nafta është tregtuar në rënie në nisje të Javës, prej pritshmërive të rritjes së ofertës, ndërkohë që kostot më të larta të energjisë dhe rritja e rasteve me Covid-19, kanë ndikuar gjithashtu kërkesën. Nafta Brent e Londrës ra me 0.8% në 81.54 dollarë për fuçi, ndërsa nafta bruto amerikane, humbi 0.7% në 80.24 dollarë për fuçi. Tregu i naftës ka qenë në trazira në 3 javët e fundit, goditur nga fuqizimi i dollarit dhe spekulimet se presidenti i Shteteve të Bashkuara, Joe Biden, mund të nxjerrë naftë në treg përmes Rezervave Strategjike, për të zbutur çmimet.
Organizata e Vendeve Eksportuese të Naftës uli projeksionët për kërkesën botërore për naftë në tremujorin e katërt me 330,000 fuçi në ditë, ndërkohë që cmimet e larta të energjisë po frenojnë rimëkëmbjen ekonomike nga pandemia. Europa është kthyer përsëri në epiqendër të Covid-19, duke bërë që disa qeveri të rivendosin masat e “dhimbshme” të karantinës, ndërkohë që dhe Kina, importuesi më i madh i naftës, po lufton me vatrën më të madhe ndonjëherë, të shkaktuar nga varianti Delta.
Rosneft në Rusi, që është kompania e dytë më e madhe në botë matur nga prodhimi, pas Saudi Aramco, paralajmëroi javën e kaluar për një “super cikël” të mundshëm në tregjet e energjisë, duke rritur pritshmëritë për çmime më të larta, ndërkohë që kërkesa tejkalon ofertën.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.