Nafta e nis javën në rënie – Ngadalësimi i kërkesës tremb investitorët. Pritet takimi i G7

Nafta e ka nisur në rënie sesionin e parë të kësaj jave, për shkak të rritjes së mundësive se ekonomia globale mund të shkojë drejt recesionit. Gjithashtu, investitorët po presin takimin e G7-ës, më vonë gjatë kësaj jave, ku mund të ketë lëvizje për eksportet ruse të naftës dhe rikthimin e marrëveshjes bërthamore me Iranin. Nafta Brent e Londrës po tregtohet në mbi 111 dollarë për fuçi, ndërsa të premten u rrit me rreth 2.8%.

Nafta Bruto amerikane po tregtohet në rreth 106 dollarë për fuçi, pas rritjes me 3.2% në sesionin e kaluar. Gjithsesi, të dyja kontratat publikuan humbje për të dytën javë me radhë. Megjithatë, analistët shprehen se çmimet e naftës janë pozicionuar mirë në mbi 100 dollarë, për shkak se furnizimi i tregut vijon të tkurret, si pasojë e sanksioneve të Perëndimit ndaj Moskës.

Liderët e G7-ës pritet të diskutojnë këtë javë rritjen e çmimeve të energjisë dhe mënyrat për të zëvëndësuar naftën dhe gazit rus, me burime të tjera. Gjithashtu, G7 do të diskutojë rikthimin e bisedimeve për marrëveshjen bërthamore të vitit 2015 me Iranin. Në fokus të liderëve të shtatë ekonomive më të industrializuara të botës do të jenë edhe investimet që nevojiten për energji fosile, pavarësisht se bota po shkon drejt energjisë së gjelbër.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.