Nafta e nis javën në rënie – Rritet numri i puseve aktive në SHBA

Çmimet e naftës po qëndrojnë në rënie në sesionin e parë të kësaj jave, për shkak të rritjes së aktivitetit të shpim-kërkimit në Shtetet e Bashkuara të Amerikës.

Gjithashtu, nafta po gjendet nën presion, për shkak të ngadalësimit të ekonomisë globale, që po ndikon edhe në kërkesën për naftë. Nafta Bruto amerikane po tregtohet në rreth 52.1 dollarë për fuçi, ndërsa nafta Brent e Londrës po tregtohet në rreth 61.8 dollarë për fuçi.

Firmat amerikane të energjisë e rritën me 7 njësi, numrin e puseve aktive, gjatë javës që u mbyll më 8 shkurt, në totalin e 854 puseve. Gjithashtu, prodhimi në SHBA po qëndron në nivelin rekord prej 11.9 milionë fuçi në ditë.

Ndër zhvillimet e tjera, kreu i gjigandit rus të naftës, Rosneft, Igor Sechin, i shkruajti një letër presidentit rus, Vladimir Putin, duke thënë se marrëveshja me OPEC për të ulur prodhimin është një kërcënim strategjik, që “i shkon për shtat” Shteteve të Bashkuara të Amerikës.

OPEC dhe Rusia vendosën të ulin prodhimin me 1.2 milionë fuçi në ditë, duke filluar nga janari i këtij viti. Marrëveshja do të zgjasë deri në qershor, ndërsa OPEC dhe aleatët do të takohen në Vjenë më 17 dhe 18 prill, për të rishikuar paktin.

Në fokus të investitorëve janë edhe bisedimet mes SHBA dhe Kinës, që rifillojnë sërish këtë javë, ndërsa palët duhet të arrijnë një marrëveshje deri në 1 mars.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.