Nafta e nis javën në rritje – Çmimet gjenden pranë nivelit më të lartë në 5 muaj

Çmimet e naftës po qëndrojnë në rritje në sesionin e parë të javës, duke prekur sërish nivelin më të lartë që nga nëntori i vitit 2018.

Nafta vijon të mbështetet nga ulja e mëtejshme e prodhimit nga OPEC, nga sanksionet amerikane ndaj Iranit dhe Venezuelës, nga luftimet në Libi dhe nga të dhënat pozitive mbi punësimin në SHBA. Nafta Brent e Londrës po tregtohet në rreth 70.6 dollarë për fuçi, ndërsa nafta Bruto amerikane po tregtohet në rreth 63.4 dollarë për fuçi. Organizata e Vendeve Eksportuese të Naftës dhe aleatët e tjerë, me në krye Rusinë, të njohur si OPEC+, kanë rënë dakord të ulin prodhimin me 1.2 milionë fuçi në ditë. Analistët shprehen se, nëse luftimet në Libi do të vazhdojnë, atëherë mund të shohim çmime më të larta të naftës. Edhe të dhënat pozitive mbi punësimin në SHBA kanë mbështetur çmimet.

Por, në anën tjetër ka edhe faktorë që mund të rrëzojnë çmimet e naftës gjatë këtij viti. Rusia, që është pjesë e marrëveshjes me OPEC, mund të rrisë prodhimin nëse marrëveshja nuk shtyhet përtej 1 korrikut. Vitin e kaluar, prodhimi në Rusi preku një nivel rekord prej 11.16 milionë fuçi në ditë. Në anën tjetër, prodhimi në Shtetet e Bashkuara të Amerikës ka arritur një rekord global prej 12.2 milionë fuçi në ditë, gjatë marsit. Ekzistojnë shqetësime edhe për shëndetin e ekonomisë globale, sidomos nëse Kina dhe Shtetet e Bashkuara dështojnë të arrijnë një marrëveshje mbi tregtinë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.