Nafta e nis javën në rritje – Mbështetet nga tensionet në Lindjen e Mesme dhe Europën Lindore
Nafta është rritur në ditën e parë tregtare të Javës, prej shqetësimeve mbi ndërprerjet e ofertës, në një periudhë të rritjes së tensioneve në Europën Lindore dhe Lindjen e Mesme, ndërkohë që OPEC ka hasur vështirësi për të rritur prodhimin. Nafta brent, çmimi referencë në bursën e Londrës, u rrit me 0.7% në 88.47 dollarë për fuçi, duke u rimëkëmbur nga humbjet e ditës së Premte.
Nafta bruto amerikane (WTI), shtoi 0.7% në 85.71 dollarë për fuçi, pasi ra me 0.5% në tregtinë e fundit. Të dy çmimet referencë në botë, janë rritur për të pestën javë radhazi, duke shtuar 2% javën e kaluar, drejt nivelit më të lartë që prej Tetorit 2014. Çmimet e naftës ndodhen në rritje me mbi 10% këtë vit, prej shqetësimeve në lidhje me ofertën. Duke shtuar shqetësimet për një ndërprerje të ofertës në Europën Lindore, New York Times raportoi se presidenti Joe Biden, po konsideron ofrimin e disa mijëra trupave ushtarake amerikane drejt aleatëve të NATO-s në Europën Lindore.
Rusia do të përballet me sanksione të ashpra ekonomike nëse cakton një regjim “marionetë” në Ukrainë, sipas zv/kryeministrit britanik, Dominic Raab, pasi Britania akuzoi Kremlinin se po përpiqet të vendosë një lider pro-Rus atje. Departamenti amerikan i Shtetit lajmëroi gjithashtu se ka urdhëruar familjet e diplomatëve që të largohen nga Ukraina. Të gjitha këto, kanë rritur shqetësimet për probleme të mëtejshme me ofertën e naftës. Në lindjen e Mesme, Emiratet e Bashkuara Arabe, gjurmuan dhe shkatërruan 2 raketa balistike të drejtuara tek vendi në Gjirin Persik, sipas deklaratës së ministrisë së mbrojtjes. OPEC+, që përfshin Organizatën e Vendeve Eksportuese të Naftës dhe prodhues të tjerë si Rusia, po has vështirësi për të rritur prodhimin në objektivin e ri prej 400,000 fuçi në ditë shtesë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.