Nafta e nis javën në rritje – Ndikon rënia e prodhimit në Venezuelë dhe Irani
Çmimet e naftës janë rritur ndjeshëm në sesionin e parë të kësaj jave, duke prekur sërish nivelin më të lartë që nga fundi i vitit 2014. Thellimi i krizës ekonomike në Venezuelë dhe mundësitë që Shtetet e Bashkuara të rivendosin sanksionet ndaj Iranit po mbështesin çmimet.
Nafta Brent e Londrës po tregtohet pranë 75.6 dollarëve për fuçi, ndërsa nafta Bruto amerikane po tregtohet në rreth 70.5 dollarë për fuçi, niveli më i lartë që nga nëntori i vitit 2014. Edhe nafta bruto e Shanghait, që filloi tregtimin në mars, preku një nivel rekord prej 72.54 dollarë.
Kjo rritje e çmimeve vjen pavarësisht zgjerimit të aktivitetit të shpim-kërkimit në SHBA. Referuar të dhënave, numri i puseve aktive në SHBA u rrit me 9 njësi, në totalin e 834 puseve.
Analistët shprehen se, arsyeja kryesore që po mbështet çmimet është kriza politike dhe ekonomike në Venezuelë, që është një eksportues i rëndësishëm i naftës. Prodhimi në këtë vend ka rënë në 1.5 milionë fuçi në ditë, niveli më i ulët që nga viti 2000, pasi vendi i Amerikës jugore ka dështuar të investojë në këtë industri.
Arsyeja tjetër është mundësia e rikthimit të sanksioneve ndaj Iranit, që mund të shkaktojë një mungesë në treg prej 500 mijë fuçi në ditë.
Të hënën, ministri i energjisë në Arabinë Saudite shprehu shqetësimin për rënien e investimeve në industrinë e naftës, që mund të ndikojë në rënien e prodhimit në të ardhmen. Në anën tjetër, çmimet po gjenden nën presion për shkak të rritjes së prodhimit në SHBA në 10.62 milionë fuçi në ditë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.