Nafta gjendet nën presion – Ngadalësimi i Kinës përhapet edhe në ekonomi të tjera

Çmimet e naftës po qendrojnë në rënie në sesionin e sotëm, për shkak të shenjave se ngadalësimi i ekonomisë kineze është shpërndarë edhe në ekonomitë e tjera, duke dëmtuar kërkesën për naftë. Lajmet aspak optimiste për ekonominë e dytë më të madhe në botë kanë rrëzuar edhe tregjet e aksioneve. Nafta Brent e Londrës po tregtohet në rreth 61.9 dollarë për fuçi, ndërsa nafta Bruto amerikane po tregtohet në rreth 53.1 dollarë për fuçi.

Kina raportoi rritjen më të ngadaltë ekonomike në të paktën 30 vitet e fundit, ndërsa të dhënat e tjera kanë sinjalizuar një rënie të porosive në fabrika, që përkthehet në rënie të aktivitetit dhe humbje të vendeve të punës. Në anën tjetër, importet e naftës nga Kina e kanë injoruar ngadalësimin ekonomik, pasi e mbyllën vitin 2018 në rreth 10 milionë fuçi në ditë. Ndërkohë, Korea e Jugut, që është një ekonomi e orientuar drejt eksporteve, raportoi se rritja ekonomike u ngadalësua në 2.7%, gjatë vitit të kaluar, hapi më i ngadaltë në 6 vitet e fundit.

Tregjet janë ndikuar negativisht edhe nga Fondi Monetar Ndërkombëtar, që uli parashikimin për rritjen ekonomike globale në 3.5%, gjatë këtij viti, nga 3.7% që ishte vlerësimi i mëparshëm. Megjithatë, pavarësisht këtyre zhvillimeve negative, nafta po gjen një mbështetje të lehtë nga marrëveshja e OPEC dhe Rusisë për të ulur prodhimin me 1.2 milionë fuçi në ditë. Por, të dhënat zyrtare treguan se, eksportuesi më i madh në botë, Arabia Saudite, eksportoi 8.23 milionë fuçi në ditë, gjatë nëntorit, nga 7.7 milionë në tetor.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.