Nafta gjendet nën presion – Rriten rezervat në SHBA. Venezuela kufizon humbjet

Çmimet e naftës po gjenden nën presion edhe në sesionin e sotëm, për shkak të rritjes së rezervave në SHBA, javën e kaluar.

Por, intensifikimi i krizës në Venezuelë dhe sanksionet amerikane ndaj Iranit kanë kufizuar humbjet. Nafta Brent e Londrës po tregtohet në rreth 71.7 dollarë për fuçi, ndërsa nafta Bruto amerikane po tregtohet në rreth 63.4 dollarë për fuçi. Volumi i tregtisë ka qenë i ulët për shkak se tregjet janë pushim me rastin e 1 majit.

Ndërkohë, rezervat e naftës në SHBA u rritën me 6.8 milionë fuçi, gjatë javës së kaluar në totalin e 466.4 milionë fuçive, gjatë javës që u mbyll më 26 prill. Investitorët janë të fokusuar edhe te situata në Venezuelë, ku lideri i opozitës, Juan Guaido, bëri thirrje për një kryengritje ndaj presidentit, Nicolas Maduro. Shumë analistë u frikësohen përshkallëzimit të dhunës në këtë vend. Investitorët po presin me interes edhe takimin e OPEC, që zhvillohet në qershor, ku do të përcaktohet politikat e prodhimit për gjysmën e dytë të vitit.

Uashingtoni i ka kërkuar kartelit të rrisë prodhimin, për të kompensuar rënien e eksporteve nga Irani. Por, Arabia Saudite, që është de facto lider i OPEC, deklaroi të martën se, nuk ka ndërmend të bëjë një gjë të tillë, madje do të kërkojë shtyrjen e marrëveshjes për uljen e prodhimit deri në fundit të vitit. Analistët mendojnë se, çmimi prej 70 dollarë për fuçi për naftën Brent është më se i drejtë për tregjet.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.