Nafta i rikthehet fitimeve – Ndikon rënia e rezervave në SHBA, javën e kaluar
Çmimet e naftës po qëndrojnë në rritje të lehtë në sesionin e sotëm, për shkak të të dhënave qeveritare që treguan një rënie surprizë të rezervave të naftës në SHBA. Edhe lehtësimi i shqetësimeve për një luftë tregtare mes SHBA dhe Kinës ka ndikuar në rritjen e çmimeve.
Nafta Bruto amerikane po tregtohet në rreth 63.6 dollarë për fuçi, ndërsa nafta Brent e Londrës po tregtohet në rreth 68.3 dollarë për fuçi. Çmimet e naftës kanë gjetur një mbështetje edhe nga stabilizimi i tregut të aksioneve, pasi Shtetet e Bashkuara të Amerikës shprehën vullnetin për të negociuar me Kinën mbi tregtinë, disa ditë pasi palët njoftuan vendosjen reciproke të tarifave mbi një gamë të gjerë produktesh.
Analistët mendojnë se, tregtarët po presin detaje të tjera mbi negociatat që do të zhvillohen mes dy ekonomive më të mëdha të botës.
Përpara publikimit të të dhënave në SHBA, nafta Bruto amerikane dhe nafta Brent e Londrës prekën nivelin më të ulët në 2 javët e fundit. Referuar të dhënave, rezervat e naftës bruto në SHBA ranë me 4.6 milionë fuçi, gjatë javës së kaluar, ndërsa analistët parashikonin një rritje prej 246 mijë fuçi. Rritja e çmimeve u mbështet edhe nga një vëzhgim i Reuters, sipas të cilit prodhimi i naftës nga OPEC preku nivelin më të ulët në 11 muajt e fundit, gjatë marsit.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.