Nafta luhatet minimalisht – Rezervat në SHBA rriten me 1.6 milionë fuçi
Çmimet e naftës po ndryshojnë minimalisht në sesionin e sotëm, megjithatë një mbështetje po e gjejnë nga mundësitë që OPEC dhe prodhuesit e tjerë të shtyjnë marrëveshjen për uljen e prodhimin edhe në vitin 2019. Nafta Bruto amerikane po tregtohet në rreth 64.6 dollarë për fuçi, ndërsa nafta Brent e Londrës po tregtohet në rreth 69.7 dollarë për fuçi. Organizata e Vendeve Eksportuese të Naftës, së bashku me disa vende të tjera që nuk janë pjesë e kësaj organizate, me në krye Rusinë, filluan uljen e prodhimit me 1.8 milionë fuçi në ditë në janar të 2017, që do të jetë në fuqi deri në fund të këtij viti.
Por, tashmë palët po e shohin të nevojshme shtrirjen e kësaj marrëveshjeje edhe në vitin 2019. Për këtë arsye, që nga fillimi i vitit 2017, nafta Brent e Londrës është rritur me rreth ¼. Gjithsesi, nafta Brent vijon të tregtohet poshtë 70 dollarëve për fuçi dhe nafta Bruto poshtë 65 dollarëve për fuçi. Referuar të dhënave zyrtare të Administratës mbi Informimin mbi Energjinë, rezervat e naftës bruto në SHBA u rritën me 1.6 milionë fuçi, gjatë javës së kaluar, në totalin e 429.95 milionë fuçive.
Në anën tjetër, edhe prodhimi arriti një nivel rekord prej 10.43 milionë fuçi në ditë, gjatë javës që u mbyll më 23 mars. Në Kinë, nafta bruto e Shanghait ra me rreth 2%, duke shkuar pranë çmimit të naftës bruto amerikane. Në sesionin e sotëm, nafta e Shanghait ra me rreth 2%, në 409.7 juan ose 65.18 dollarë për fuçi. që nga sesioni i së hënës, kur ishte edhe debutimi në bursë, nafta e Shanghait ka rënë me rreth 10%.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.