Nafta “marshon” pas Sirisë, sulmet ajrore të SHBA rrisin tensionet në Lindjen e Mesme
Sulmi i papritur me raketa i Shteteve të Bashkuara të Amerikës ndaj Sirisë ka gjeneruar një marshim të çmimeve të naftës gjatë sesionit të sotëm, me më shumë se 2% që në orët e para. Sulmi sinjalizon një përshkallëzim të tensioneve në Lindjen e Mesme, çka do të ketë patjetër edhe ndikim në prodhimin e arit të zi.
Në çelje të sesionit të sotëm, Nafta Brent e Londrës kuotohej pranë nivelit të 56.08 dollarëve për fuçi, ndërsa ajo bruto amerikane pranë 52.46 dollarëve për fuçi. Të dy benchmarkët kryesorë janë pranë nivelit më të lartë që prej ditëve të para të marsit.
Marshimi i çmimeve si pasojë e sulmeve në Siri, vjen pavarësisht faktit se vendi ka një prodhim të ulët dhe ndikim minimal në tregun global të naftës. Vendndodhja gjeografike e Sirisë në Lindjen e Mesme si dhe tensionet gjeopolitike që mund të lindin janë faktorët kryesorë që shqetësojnë investitorët.
Roel Korkuti/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.