Nafta ndryshon minimalisht – Humbjet kufizohen nga rënia e prodhimit në Kanada
Çmimet e naftës janë tërhequr nga niveli më i lartë në 3 vite e gjysëm, të regjistruar në sesionin e kaluar dhe po ndryshojnë minimalisht, gjatë ditës së sotme. Referuar të dhënave, tregu fizik vijon të jetë i furnizuar mirë, pavarësisht kërkesës rekord dhe çrregullimeve në eksporte. Nafta Bruto amerikane po tregtohet në rreth 72.5 dollarë për fuçi, ndërsa nafta brent e Londrës po tregtohet në rreth 77.6 dollarë për fuçi.
Çmimet e naftës janë rritur ndjeshëm gjatë këtij viti, për shkak të shtrëngimit të kushteve të tregut, kryesisht si pasojë e kërkesës rekord dhe uljes së prodhimit nga OPEC. Por, çrregullimi i paplanifikuar i furnizimit nga Kanadaja, Libia dhe Venezuela kanë mbështetur më tej çmimet. Por, ndërkohë që prodhimi është ngadalësuar në disa vende, në Shtetet e Bashkuara të Amerikës po i afrohet nivelit të 11 milionë fuçive. Me Rusinë dhe Arabinë Saudite që pritet të rrisin prodhimin, shumë shpejt do të bëhen tre vende që prodhojnë mbi 11 milionë fuçi naftë në ditë.
Kjo do të thotë se, vetëm këto tre vende plotësojnë rreth 1/3 e konsumit global të naftës. Referuar të dhënave të publikuara nga Agjencia për Informimin mbi Energjinë, rezervat tregtare në SHBA ranë me rreth 10 milionë fuçi, gjatë javës që u mbyll më 22 qershor, në totalin e 416.64 milionë fuçive, duke rënë poshtë mesatares 5-vjeçare prej rreth 425 milionë fuçi.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.