Nafta ndryshon minimalisht – Rritja e rezervave dhe prodhimit në SHBA, presion mbi çmimet

Nafta në tregjet ndërkombëtare po tregtohet e qëndrueshme, gjatë sesionit të sotëm. Megjithatë, vijon të gjendet nën presion për shkak të rritjes së rezervave dhe prodhimit në SHBA, gjatë javës së kaluar.

Çmimet e naftës po ndryshojnë minimalisht gjatë sesionit të sotëm, por po gjenden nën presion për shkak të rritjes së rezervave në SHBA dhe mbifurnizimit të tregut. Nafta Brent e Londrës po tregtohet në rreth 72 dollarë për fuçi, ndërsa nafta Bruto amerikane po tregtohet në rreth 61.9 dollarë për fuçi.

Një grup prodhuesish në Lindjen e Mesme dhe Rusia vendosën në qershorin e kaluar të lehtësojnë politikat e uljes së prodhimit, që hynë në fuqi në vitin 2017, pas presioneve të presidentit amerikan, Donald Trump. Por, pavarësisht hyrjes në fuqi të sanksioneve amerikane ndaj Iranit, tendenca e çmimeve vijon në rënie.

Sipas informacioneve, OPEC dhe Rusia janë të kënaqur me çmime pranë 70 dollarëve për fuçi. Megjithatë, në treg ekzistojnë shqetësime për mbifurnizimin e tregut, pasi në Shtetet e Bashkuara prodhimi arriti në 11.6 milionë fuçi në ditë, gjatë javës që u mbyll më 2 nëntor, referuar të dhënave të Administratës për Informimin mbi Energjinë.

Madje agjencia parashikon se prodhimi në SHBA do të arrijë në 12 milionë fuçi në ditë, deri në fund të vitit 2019. Njëkohësisht, rezervat e naftës u rritën me 5.8 milionë fuçi, gjatë javës së kaluar, në totalin e 431.79 milionë fuçi.

Prodhimi nuk po rritet vetëm në SHBA, por edhe në vende të tjera, si në Rusi, Arabinë Saudite, Irak dhe Brazil. Në këtë situatë, investitorët i frikësohen një skenari siç ndodhi në periudhën 2014-2017, kur çmimet e naftës ranë deri në 30 dollarë për fuçi.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.