Nafta ndryshon minimalisht – Tensionet gjeopolitike ofrojë mbështetje për çmimet
Çmimet e naftës po qëndrojnë në rënie të lehtë në sesionin e sotëm, por megjithatë po tregtohen pranë nivelit më të lartë që nga viti 2014, të regjistruar në sesionin e kaluar. Megjithatë, tregu po gjen një mbështetje nga shqetësimet për një ndërhyrje ushtarake të Shteteve të Bashkuara të Amerikës dhe aleatëve në Siri.
Nafta Brent e Londrës po tregtohet pranë 71.7 dollarëve për fuçi, ndërsa nafta Bruto amerikane po tregtohet në rreth 66.6 dollarë për fuçi. në sesionin e kaluar, dy bençmarkët kryesorë prekën nivelin më të lartë që nga viti 2014, pasi Arabia Saudite deklaroi se kishte rrëzuar disa raketa që kishin si objektiv Rihadin, ndërsa presidenti amerikan, Donald Trump, paralajmëroi Rusinë për një aksion ushtarak në Siri. Gjithashtu, edhe shqetësimet për një luftë tregtare mes Shteteve të Bashkuara dhe Kinës po ofrojnë një mbështetje për çmimet.
Ditën e sotme, Kina tha se kërcënimet për të vendosur tarifa të reja mbi importet e anasjellta u imponuan nga Shtetet e Bashkuara dhe Pekini është i gatshëm të kundërpërgjigjet. Ministria kineze e Tregtisë tha gjithashtu, se nuk ka pasur negociata dypalëshe me Uashingtonin. Megjithatë, furnizimi i tregut mbetet i bollshëm dhe sipas analistëve kjo mund të shtojë presionin mbi çmimet. Sipas një raporti të Barclays, tensionet gjeopolitike mund ta mbajnë naftën Brent mbi 70 dollarë për fuçi, gjatë prillit dhe majit.
Referuar të dhënave zyrtare në SHBA, rezervat e naftës bruto u rritën me 3.3 milionë fuçi, gjatë javës që u mbyll më 6 prill, në totalin e 428.64 milionë fuçive, ndërsa prodhimi preku një rekord të ri prej 10.53 milionë fuçi në ditë. Tashmë, Shtetet e Bashkuara prodhojnë më shumë naftë se eksportuesi më i madh në botë, Arabia Saudite. Vetëm Rusia prodhon më shumë se SHBA, rreth 11 milionë fuçi në ditë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.