Nafta në $100? – Ekspertët: Përplasja Trump-OPEC do gjenerojë rritje të çmimeve

Prodhuesit e Opec dhe Donald Trump janë përfshirë në një përballje të fortë verbale mes tyre, edhe kjo, sipas ekspertëve të tregut, do të gjenerojë një rritje të ndjeshme të çmimeve të naftës. Madje, shumëkush spekulon për një nivel në 100 dollarë për fuçi, brenda fundit të këtij viti.

Më herët gjatë javës, Donald trump i bëri apel OPEC që të rrisë prodhimin në mënyrë që të parandalojë një rritje të mëtejshme të çmimeve, në një përpjekje, që sipas ekspertëve, vjen për arsye të  qarta elektorale, përpara zgjedhjeve të mes-mandatit që do të mbahen në muajin Nëntor.

Madje, Donald Trump akuzoi OPEC se është duke rrjepur botën. Ky apel vjen në një kohë që Shtetet e Bashkuara presin të hyjnë në fuqi sanksionet ndaj naftës së Iranit.

Madje, veç kësaj, shtetet e bashkuara po i kërkojnë me ngulm blerësve të naftës së Iranit që të mos importojnë më, në mënyrë që të bindin Teheranin për një marrëveshje të re bërthamore.

Pra, ndërkohë që Donald Trump kërkon rritje të prodhimit në nivel global, vetë bën të kundërtën, nxit një rënie të ofertës në tregje, çka pashmangshmërisht përkthehet në rritje të çmimeve.

Arabia Saudite ndërkohë i është përgjigjur apelit të Trump se ka rreth 1.5 milionë fuçi në ditë që mund t`i fus në treg kur të dojë.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.