Nafta në nivelin maksimal që nga 2014 – Ndikon rënia e rezervave në SHBA dhe rritja e kërkesës globale
Çmimet e naftës po qëndrojnë në rritje edhe në sesionin e sotëm, duke prekur njëkohësisht nivelin më të lartë që nga vitin 2014. Ulja e prodhimit nga OPEC dhe kërkesa e shëndoshë kanë ndihmuar në balancimin e tregut, por disa analistë kanë paralajmëruar për mbinxehjen e tregut.
Në tërësi, rritja e tregut global, duke përfshirë edhe aksionet ka ndihmuar gjithashtu në rritjen investimeve në kontratat e naftës. Nafta Bruto amerikane po tregtohet në rreth 63.4 dollarë për fuçi, niveli më i lartë që nga 9 dhjetori i vitit 2014.
Ndërsa nafta Brent e Londrës po tregtohet në rreth 69 dollarë për fuçi, niveli më i lartë që nga maji i vitit 2015. Analistët shprehen se, shtyrja e marrëveshjes së OPEC për uljen e prodhimit dhe rënia e rezervave globale të naftës ka ndihmuar në rritjen e çmimeve.
Në nëntorin e vitit të kaluar, Organizata e Vendeve Eksportuese të Naftës, së bashku me Rusinë dhe disa prodhues të tjerë, vendosën të shtyjnë uljen e prodhimit me 1.8 milionë fuçi në ditë, deri në fund të këtij viti.
Përsa i përket të dhënave të tjera, Instituti Amerikan i Naftës deklaroi se, rezervat në SHBA ranë me 11.2 milionë fuçi, gjatë javës që u mbyll më 5 janar, në totalin e 416.6 milionë fuçive.
Në anën tjetër, Administrata për Informimin mbi Energjinë rriti parashikimin për kërkesën globale të naftës me 100 mijë fuçi në ditë, gjatë vitit 2018.
Por, megjithatë analistët paralajmërojnë se, tregu mund të mbinxehet, pasi çmimet janë rritur me rreth 13%, që nga fillimi i dhjetorit. Gjithashtu, prodhimi në Shtetet e Bashkuara të Amerikës parashikohet të rritet mbi 10 milionë fuçi, gjatë këtij viti, një nivel i përafërt me Arabinë Saudite dhe Rusinë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.