Nafta, në nivelin më të lartë 1-mujor – Çmimet mbështeten nga rënia e rezervave në SHBA
Çmimet e naftës kanë prekur nivelin më të lartë në thuajse një muaj, për shkak të të dhënave në SHBA që treguan një rënie të rezervave të naftës, në masë më të madhe se parashikimet e analistëve.
Nafta Brent e Londrës po tregtohet në rreth 66 dollarë për fuçi, ndërsa nafta Bruto amerikane po tregtohet në rreth 59 dollarë për fuçi. Çmimet janë mbështetur edhe nga kërkesa që pritet të bëjë kompania Philadelphia Energy Solutions për të mbyllur përgjithmonë rafinerinë e saj në këtë qytet, pasi një zjarr shkaktoi dëme të mëdha në këtë kompleks. Referuar të dhënave jo zyrtare të publikuara në SHBA nga Instituti Amerikan i Naftës, rezervat ranë me 7.5 milionë fuçi, gjatë javës së kaluar, në totalin e 474.5 milionë fuçive, ndërsa analistët parashikonin një rënie me 2.5 milionë fuçi.
Megjithatë, tregjet po presin të dhënat zyrtare që publikohen më vonë gjatë ditës së sotme nga administrata amerikane. Rënia e rezervave të naftës vjen në një kohë të konfliktit mes Uashingtonit dhe Teheranit, që ka rikthyer frikën se mund të çrregullohet qarkullimi i anijeve cisternë në Gjirin e Hormuzit. Presidenti amerikan, Donald Trump kërcënoi sërish të martën se do të “zhdukë disa pjesë të Iranit”, nëse sulmon interesat amerikane. Ndërsa, Teherani i ka cilësuar sanksionet e reja të Shteteve të Bashkuara, si të vonuara mendërisht.
Marrëdhëniet mes dy vendeve kanë qenë të tensionuara që kur Uashingtoni akuzoi Teheranin për sulmet ndaj dy anijeve cisternë në Gjirin e Hormuzit, por Irani përgënjeshtroi çdo rol në këtë ngjarje.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.