Nafta në nivelin minimal 6-javor – Ndikon forcimi i dollarit dhe rritja e prodhimit në SHBA

Çmimet e naftës po qëndrojnë në rënie edhe në sesionin e sotëm, duke prekur njëkohësisht nivelin më të ulët në 6 javët e fundit. Të dhënat e publikuara treguan se, prodhimi i naftës në SHBA preku një nivel të ri rekord, ndërsa tubacioni në Detin e Veriut ka filluar punën me kapacitet të plotë.

Rritja e yieldit të bonove 10-vjeçare amerikane, në nivelin më të lartë në 4 vitet e fundit, ka ndikuar në rritjen e dollarit amerikan, që pritet të publikojë fitimet më të mëdha javore që nga nëntori i vitit 2016.

Nafta Brent e Londrës po tregtohet në rreth 65 dollarë për fuçi, niveli më i ulët për vitin 2018. Ndërsa nafta Bruto amerikane po tregtohet në rreth 61.3 dollarë për fuçi.

Që kur arriti nivelin më të lartë në katër vitet e fundit, prej 71 dollarë për fuçi, në fund të janarit, nafta Brent ka humbur rreth 8% të vlerës.

Analistët mendojnë se tregu i naftës do të vijojë të korrektohet në kahun e poshtëm, për shkak të pritshmërive për rritjen e prodhimit në SHBA dhe forcimit të dollarit amerikan.

Çmimet e naftës po gjenden nën presion edhe për shkak se, tubacioni Forties në detin e Veriut filloi punën me kapacitet të plotë. Ky tubacion, që transporton rreth ¼ e naftës të prodhuar në Detin e Veriut, u mbyll përkohësisht në ditën e mërkurë, por u rihap të enjten.

Për sa i përket të dhënave, Administrata për Informimin mbi Energjinë rriti parashikimin për prodhimin e naftës në SHBA, gjatë 2018, në 10.59 milionë fuçi në ditë, në rritje me 320 mijë fuçi krahasuar me parashikimin e javës së kaluar.

Në anën tjetër, rezervat e naftës bruto në SHBA u rritën me 1.9 milionë fuçi, gjatë javës që u mbyll më 2 shkurt, në totalin e 420.25 milionë fuçive. Ndërkohë, konsumi në Kinë i naftës po rritet, pasi të dhënat treguan se, importet gjatë janarit prekën shifrën e 9.57 milionë fuçive në ditë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.