Nafta, në rënie të konsiderueshme – Çmimet, nën presion për shkak të luftës tregtare SHBA-Kinë
Çmimet e naftës kanë rënie ndjeshëm në sesionin e sotëm për shkak të shqetësimeve se lufta tregtare SHBA-Kinë mund të dëmtojë ekonominë globale.
Gjithsesi, tensionet në Lindjen e Mesme kanë kufizuar disi humbjet. Nafta Brent e Londrës po tregtohet në rreth 68.7 dollarë për fuçi, ndërsa nafta Bruto amerikane po tregtohet në rreth 57.8 dollarë për fuçi. Investitorët janë të shqetësuar për perspektivën makro të kërkesës globale, në mënyrë të veçantë përballë rritjes së tensionit tregtar mes dy ekonomive më të mëdha në botë.
Gjithashtu, një shqetësim tjetër është rënia e monedhave në tregjet në zhvillim, që po e bëjnë më të shtrenjtë naftën e dominuar në dollarë amerikanë. Megjithatë, pavarësisht shqetësimeve për ngadalësimin e ekonomisë, kërkesa vijon të jetë e lartë, në një mesatare prej mbi 100 milionë fuçi në ditë, gjatë këtij viti. Por, analistët janë të shqetësuar se tkurrja e tregut të kreditit dhe ngadalësimi ekonomik do të dëmtojnë tregtimin e lëndëve të para. Gjatë këtij viti, ndërkohë, çmimet janë rritur ndjeshëm, për shkak të marrëveshjes së OPEC dhe Rusisë për të ulur prodhimin me 1.2 milionë fuçi në ditë.
Prodhuesit e naftës do të takohen në fund të qershorit për të përcaktuar politikat e prodhimit për gjysmën e dytë të vitit. Zëvendëskryeministri i Rusisë, Anton Siluanov, deklaroi se vendi i tij do të konsiderojë një shtyrje të mundshme të marrëveshjes për uljen e prodhimit, e cila skadon në fund të qershorit.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.