Nafta në rënie të lehtë – Arabia Saudite angazhohet të ulë rezervat globale
Çmimet e naftës po realizojnë humbje modeste në sesionin e sotëm, por megjithatë po qëndrojnë pranë nivelit më të lartë në 4 javët e fundit.
Humbjet janë kufizuar nga deklarata e Arabisë Saudite, se është e vendosur ti japë fund mbifurnizimit, që e ka shoqëruar tregun e naftës për 3 vite me radhë.
Nafta Brent e Londrës po tregtohet pranë 58 dollarëve për fuçi, ndërsa në sesionin e kaluar u rrit me 1.7%. Nafta Bruto amerikane po tregtohet në rreth 52.2 dollarë për fuçi.
Ministri i Energjisë në Arabinë Saudite, Khalid al-Falih, deklaroi se, mbretëria është e vendosur të ulë rezervat e naftës bruto në vendet e industrializuara, anëtare të OECD-së.
Në kohët e fundit ka pasur shenja të qarta se, rezervat globale të naftës po bien, ndërsa kërkesa është e fortë.
Por, megjithatë, çmimet e kanë të vështirë të tejkalojnë nivelin e 60 dollarëve për fuçi, që konsiderohet një çmim i arsyeshëm nga OPEC.
Analistët janë të paqartë nëse OPEC, plus Rusia dhe nëntë vende të tjera prodhuese do të shtyjnë marrëveshjen e uljes së prodhimit përtej marsit të vitit të ardhshëm.
Ndërkohë, të dhënat e publikuara nga Instituti Amerikan i Naftës treguan se, rezervat e naftës bruto në SHBA u rritën me 519 mijë fuçi javën e kaluar, kundrejt parashikimeve të analistëve për një rënie me 2.6 milionë fuçi.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.