Nafta në rënie të lehtë – Arabia Saudite mbështet shtyrjen e uljes së prodhimit
Çmimet e naftës po qëndrojnë në rënie të lehtë në sesionin e sotëm, pas fitimeve të konsiderueshme në orët e pasdites të së enjtes. Nafta Brent e Londrës po tregtohet poshtë 60 dollarëve për fuçi, por në pasditen e djeshme u mbështet nga komentet e Princit të Arabisë Saudite, i cili tha se është pro shtyrjes së afatit për uljen e prodhimit nga OPEC.
Për këtë arsye, në sesionin e kaluar, nafta Brent u rrit deri në 59.55 dollarë për fuçi. Ndërsa, nafta Bruto amerikane po tregtohet në rreth 52.6 dollarë për fuçi.
Megjithatë, fitimet po kufizohen nga rritja e rezervave dhe prodhimit të naftës në Shtetet e Bashkuara të Amerikës. Princi i Arabisë Saudite, Mohammad bin Salman, deklaroi në një intervistë për Reuters se, mbretëria e mbështet zgjatjen e afatit për uljen e prodhimit për të stabilizuar kërkesën dhe ofertën.
Organizata e Vendeve Prodhuese të Naftës, OPEC, dhe vendet e tjera me në krye Rusinë, janë angazhuar të ulin prodhimin e naftës me 1.8 milionë fuçi në ditë, deri në mars të 2018.
OPEC do të diskutojë strategjinë e ardhshme të prodhimit në takimin e 30 nëntorit.
Çmimet e naftës janë rritur pranë niveleve maksimale të këtij viti, për shkak të shenjave se, raporti kërkesë-ofertë po balancohet, konfliktit në veri të Irakut dhe mundësive të rivendosjes së sanksioneve ndaj Iranit nga Shtetet e Bashkuara të Amerikës.
Gjithsesi, rritja e prodhimit të naftës bruto në SHBA vazhdon të jetë një ndër shqetësimet kryesore për OPEC.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.