Nafta, në rënie të lehtë – Investitorët, të shqetësuar për ngadalësimin e ekonomisë globale

Çmimet e naftës po qëndrojnë në rënie të lehtë në sesionin e parë të javës, për shkak të shenjave për ngadalësimin e ekonomisë globale, si pasojë e luftës tregtare SHBA-Kinë. Por, fitimet po kufizohen nga sulmet ndaj anijeve cisternë më Gjirin e Omanit javën e kaluar.

Nafta Brent e Londrës po tregtohet në rreth 61.7 dollarë për fuçi, ndërsa nafta Bruto amerikane po tregtohet në rreth 52.2 dollarë për fuçi. Referuar të dhënave të publikuara, rritja e prodhimit industrial në Kinë preku nivelin më të ulët në 17 vitet e fundit, kryesisht për shkak të luftës tregtare. Ndërkohë, ditën e sotme India implementoi tarifa ndaj produkteve amerikane, si një përgjigje ndaj Uashingtonit për të tarifuar produktet indiane të importit.

Në Lindjen e Mesme, tensionet vijojnë të jenë të larta, pasi Shtetet e Bashkuara akuzuan Iranit për sulmet ndaj anijeve cisternë. Rreth 1/5 e naftës globale kalon pikërisht nëpërmjet Gjirit të Hormuzit. Sekretari amerikan i Shtetit, Mike Pompeo, deklaroi të dielën se Uashingtoni nuk dëshiron luftë me Iranin, por do të ndërmarrë çdo aksion të nevojshëm, duke përfshirë diplomacinë, për të garantuar qarkullimin e sigurt të anijeve në Lindjen e Mesme.

Çmimet gjetën edhe një mbështetje të lehtë nga komentet e ministrit saudit të energjisë, Khalid al-Falih, i cili tha gjatë fundjavës se me shumë mundësi OPEC do të takohet përgjatë fillimit të korrikut, ndërsa shtoi se shpreson të arrihet një marrëveshje për uljen e prodhimit.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.