Nafta në rënie të lehtë – OPEC+ shtyn marrëveshjen për uljen e prodhimit deri në mars

Çmimet e naftës po qëndrojnë në rënie të lehtë gjatë sesionit të sotëm, për shkak të shqetësimeve se ekonomia globale po vijon të dobësohet, që ka eklipsuar edhe marrëveshjen e OPEC dhe Rusisë për të shtyrë marrëveshjen për uljen e prodhimit deri në mars të vitit të ardhshëm.

Nafta Brent e Londrës po tregtohet në rreth 64.8 dollarë për fuçi, ndërsa nafta Bruto amerikane po tregtohet në rreth 58.8 dollarë për fuçi. Organizata e Vendeve Eksportuese të Naftës dhe aleatët e tjerë ranë dakord për të shtyrë uljen e prodhimit deri në mars të vitit 2020, për të mbështetur çmimet. Ndërkohë, rezervat e naftës në Shtetet e Bashkuara parashikohet të kenë rënë për të tretën javë me radhë, gjatë javës së kaluar.

Megjithatë, çmimet po gjenden nën presion për shkak se ngadalësimi i ekonomisë globale po dëmton edhe kërkesën për naftë. Ndërkohë që Kina dhe Shtetet e Bashkuara ranë dakord të rifillojnë bisedimet mbi tregtinë, aktiviteti i fabrikave në Europë dhe Azi ra ndjeshëm gjatë qershorit. Gjithashtu, në një publikim në Twitter Presidenti amerikan, Donald Trump, tha se marrëveshja tregtare me Kinën duhet të jetë disi në favor të Uashingtonit, që nxiti dyshime mbi perspektivën e një marrëveshje tregtare mes dy ekonomive më të mëdha në botë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.