Nafta, në rënie të lehtë – Stimujt fiskalës dhe monetarë në Kinë kufizojnë humbjet
Çmimet e naftës po qendrojnë në rënie të lehtë në sesionin e sotëm, pas rritjes me rreth 3% një ditë më parë, që u mbështetën nga stimujt shtesë të qeverisë kineze dhe uljes së prodhimit nga OPEC dhe Rusia.
Nafta Brent e Londrës po tregtohet në rreth 60.40 dollarë për fuçi, ndërsa nafta Bruto amerikane po tregtohet në rreth 51.7 dollarë për fuçi. Banka Qendrore e Kinës bëri injektimin më të madh ditor të parave cash në sistemin bankar, nëpërmjet operacioneve të anasjellta të riblerjes.
Tregjet e morën këtë operacion si një evidencë se autoritetet në Kinë po shkojnë drejt një politike të lehtësimit sasior, për shkak të ngadalësimit të ekonomisë së dytë më të madhe në botë.
Gjithashtu, edhe Komisioni Kombëtar për Zhvillimin dhe Reformat sinjalizoi se do të ofrojë më shumë stimuj fiskalë për ekonominë. Megjithatë, është pikërisht ngadalësimi ekonomik në Kinë dhe në shumë vende të tjera që po ushtron presion mbi çmimet.
Edhe ekonomia amerikane, po dëmtohet më shumë se parashikimet nga mbyllja e qeverisë federale, që ka hyrë në javën e katërt. Perspektiva për ekonominë globale është zbehur edhe më tej, pasi parlamenti britanik rrëzoi marrëveshjen e kryeministres, Theresa May, për Brexit.
Një shqetësim tjetër për tregun e naftës është edhe rritja e prodhimit në SHBA, që aktualisht po qendron në një rekord prej 11.7 milionë fuçi në ditë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.