Nafta, në rritje të lehtë – Kina dhe Japonia ofrojnë stimuj për ekonomitë
Çmimet e naftës po qëndrojnë në rritje të lehtë në sesionin e sotëm, pasi Kina dhe Japonia deklaruan se do të përdorin stimuj fiskalë, për të trajtuar ngadalësimin e ekonomive, që po rëndon edhe në tregjet financiare.
Nafta Brent e Londrës po tregtohet në rreth 61.7 dollarë për fuçi, ndërsa nafta Bruto amerikane po tregtohet në rreth 53.2 dollarë për fuçi.
Në sesionin e kaluar, çmimet ranë me rreth 2%, për shkak të shqetësimeve se ngadalësimi i ekonomisë kineze është shpërndarë edhe në vende të tjera, duke dëmtuar kërkesën për naftë.
Ministria kineze e financave deklaroi se qeveria do të ofrojë shpenzime fiskale, gjatë këtij viti, për të mbështetur ekonominë, që regjistroi rritjen më të ngadaltë në 3 dekadat e fundit, gjatë vitit të kaluar.
Gjithashtu, edhe Banka e Japonisë siguroi tregjet se do të vijojë të mbajë politikat ultra-lehtësuese, të cilat kanë filluar në vitin 2013.
Lajmi vjen pasi Japonia raportoi një rënie të eksporteve me 3.8%, gjatë dhjetorit të 2018, rënia më e madhe në dy vitet e fundit.
Në anën tjetër, importet e naftës nga Japonia ranë në 3 milionë fuçi në ditë, gjatë 2018-ës, niveli më i ulët që nga viti 1979, kur filluan të regjistroheshin këto të dhëna.
Megjithë këto shqetësime, çmimet po gjejnë një mbështetje të lehtë nga marrëveshja e OPEC dhe Rusisë për të ulur prodhimin me 1.2 milionë fuçi naftë në ditë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.