Nafta në rritje të lehtë – Ndikon rënia e aktivitetit të shpim-kërkimit në SHBA
Çmimet e naftës po qëndrojnë në rritje të lehtë në sesionin e parë të kësaj jave, për shkak se tubacioni Forties, që transporton naftë nga Deti i Veriut drejt Britanisë, vijon të jetë i mbyllur.
Gjithashtu, çmimet janë mbështetur lehtë nga sinjalet se, “boom”-i i prodhimit në SHBA mund të jetë ngadalësuar. Nafta Bruto amerikane po i tregtohet në rreth 57.4 dollarë për fuçi, ndërsa nafta Brent e Londrës po tregtohet në rreth 63.4 dollarë për fuçi.
Tregtarët shprehen se, nëse tubacioni në Detin e Veriut vijon të jetë i mbyllur, atëherë tendenca e çmimeve do të vijojë të jetë në rritje. Analistët shprehet se, mbyllja e tubacionit Forties dhe rënia e rezervave në SHBA janë arsyet kryesore që po mbështesin çmimet gjatë sesionit të sotëm.
Në SHBA, kompanitë e energjisë kanë ulur numrin e puseve aktive, për herë të parë në 6 javët e fundit, gjatë javës që u mbyll më 15 dhjetor.
Kjo nënkupton se, prodhimi në ekonominë më të madhe në botë, mund të shënojë rënie të lehtë, por megjithatë po qëndron pranë niveleve rekord, të përafërta më Arabinë Saudite dhe Rusinë, që prodhojnë 10 milionë dhe 11 milionë fuçi në ditë, respektivisht.
Gjatë këtij viti, rritja e prodhimit në SHBA ka dëmtuar marrëveshjen e OPEC për uljen e prodhimit me 1.8 milionë fuçi në ditë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.