Nafta, në rritje të lehtë – OPEC pritet të shtyjë marrëveshjen për uljen e prodhimit

Nafta po qëndron në rritje të lehtë në sesionin e sotëm, për shkak të pritshmërive se OPEC dhe aleatët do të vijojnë me marrëveshjen për uljen e prodhimit deri në fund të këtij viti.

Megjithatë, rritja po kufizohet nga shqetësimet që kanë të bëjnë me ngadalësimin e ekonomisë, si pasojë e luftës tregtare. Rusia deklaroi se mund të mbështesë një shtyrje të uljes së prodhimit, që është në fuqi nga janari i këtij viti. Nafta Brent e Londrës po tregtohet në rreth 62.3 dollarë për fuçi, ndërsa nafta Bruto amerikane po tregtohet në rreth 53.6 dollarë për fuçi. Që nga niveli maksimal prej 75 dollarë për fuçi të regjistruar në muajin prill, nafta Brent ka rënë me rreth 20%, e ndikuar kryesisht nga ngadalësimi i ekonomisë globale.

Organizata e Vendeve Eksportuese të Naftës dhe disa aleatë, duke përfshirë Rusinë, që ndryshe njihen si OPEC+, kanë filluar zbatimin e marrëveshjes për uljen e prodhimit me 1.2 milionë fuçi që nga fillimi i këtij viti. Por, në takimin e qershorit prodhuesit pritet të vendosin një shtyrje të kësaj marrëveshjeje, mbase deri në fund të vitit. Ndërkohë, analistët mendojnë se rritja e kërkesës globale për naftës mund të bjerë poshtë 1 milionë fuçive në ditë, gjatë këtij viti, nga 1.4 milionë që vlerësohej më parë.

Investitorët janë në pritje të të dhënave që publikohen në Shtetet e Bashkuara të Amerikës mbi rezervat e naftës për javën e kaluar. Analistët parashikojnë se rezervat e naftës do të rënë me 500 mijë fuçi gjatë javës që u mbyll më 7 qershor.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.