Nafta publikon humbje javore – Investitorët, të shqetësuar për rritjen e infektimeve në Kinë
Nafta po qëndron në rënie në sesionin e sotëm, pasi infektimet në Kinë regjistruan rritjen më të madhe ditore në 10 muajt e fundit. Për këtë arsye, autoritetet kanë vendosur disa qytete të karantinë për të parandaluar përhapjen e virusit.
Nafta po qëndron në rënie në sesionin e fundit të kësaj jave, për shkak të shqetësimeve se izolimi i më shumë qyteteve në Kinë, do të dëmtojë kërkesën për naftë. Kjo ja zbehur edhe pritshmëritë se Shtetet e Bashkuara do të ofrojnë një tjetër paketë stimujsh për ekonominë. Nafta Brent e Londrës po tregtohet në rreth 55.5 dollarë për fuçi, ndërsa nafta Bruto amerikane po tregtohet në rreth 52.8 dollarë për fuçi.
Të dy bençmarkët pritet të publikojnë humbje javore për herë të parë në tre javët e fundit. Ndërkohë që prodhuesit po përballen me disa sfida për të balancuar kërkesën dhe ofertën në treg, gjithmonë e më shumë zona po vendosen në karantinë për shkak të rritjes së infektimeve me koronavirus. Megjithatë, humbjet po kufizohen disi nga dobësimi i dollarit amerikan, që i bën lëndët e para që tregtohet në monedhën e gjelbër më të lira për investitorët e huaj.
Presidenti i zgjedhur amerikan, Joe Biden prezantoi një paketë tjetër stimujsh prej rreth 2 trilionë dollarë, në mbështetje të bizneseve dhe familjeve, që janë goditur nga pandemia. Kjo paketë mund të rrisë kërkesën për naftë, në ekonominë më të madhe në botë. Referuar të dhënave të tjera, importet e naftës nga Kina u rritën me 7.3% në vitin 2020. Gjithashtu, Kina raportoi rritjen më të madhe të infektimeve me koronavirus brenda një dite, në më shumë se 10 muaj.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.