Nafta qëndron tek niveli i lartë i 2014-s – Mbështetet nga problemet me ofertën. Investitorët tërheqin fitimet

Nafta është tërhequr ditën e Enjte ndërkohë që investitorët mbyllën pozicionet për të marrë fitimin, pas një rritjeje të gjatë të çmimeve, pavarësisht se kërkesa e fortë dhe ndërprerjet afat-shkurtër të ofertës po vazhdojnë të mbështesin çmimet, që ndodhen në nivelin më të lartë që prej vitit 2014.  Nafta Brent e Londrës ra me 0.6% në 87.95 dollarë për fuçi, pasi humbi mbi 1 dollarë më herët gjatë tregtisë.  Çmimi që kuotohet në bursën e Londrës u rrit në 89.17 dollarë ditën e Mërkurë, që ishte niveli më i lartë që prej Tetorit 2014.

Nafta Bruto Amerikane ra me 0.1% në 86.9 dollarë për fuçi, pasi humbi gjithashtu 1 dollarë më herët.  Indeksi preku 87.91 dollarë ditën e Mërkurë, gjithashtu në nivelin më të lartë që prej Tetorit 2014.  Agjencia Ndërkombëtare e Energjisë ka bërë të ditur se kërkesa për naftë është gati për të shënuar nivelet e para-pandemisë, ndërkohë që ndërprerjet afat-shkurtër në ofertë po japin gjithashtu nxitje tek çmimet.

Megjithatë, fluksi i naftës përmes tubacionit Kirkuk-Ceyhan ka rinisur, pasi ndaloi ditën e Martë, si pasojë e një shpërthimi në provincën Juglindore të Kahramanmaras në Turqi.   Shqetësimet mbi ofertën janë shtuar këtë javë pasi grupi Houthi në Yemen sulmoi Emiratet e Bashkuara Arabe, prodhuesin e tretë më të madh të OPEC, ndërs Rusia, prodhuesi i dytë më i madh në botë, ka mbledhur trupat në kufirin me Ukrainën, duke shtuar frikën e një sulmi. Diçka tjetër që po mbështet çmimet e naftës është rimëkëmbja e kërkesës për karburant pas pandemisë.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.