Nafta rimëkëmbet prej ofertës së tkurrur – Bisedimet për paqe dhe rënia e kërkesës në Kinë vendosin “tavan” tek rritja
Nafta ka lënë pas humbjet e mëdha, duke u rimëkëmbur lehtë në tregtinë e së Mërkurës, prej ofertës së tkurrur dhe perspektivës së më shumë sanksioneve kundër rusisë, pavarësisht shenjave të progresit të bisedimeve për paqe mes Moskës dhe Kievit.
Nafta Brent, çmimi në bursën e Londrës, u rrit me 1.52 % në 111.88 dollarë për fuçi, ndërsa nafta bruto amerikane, u rrit me 1.82 % në 106.20 dollarë për fuçi.
Analistët thonë se luhatja e çmimeve pasqyron situatën tejet të ndjeshme tek investitorët. Tregu u përqendrua tek oferta e tkurrur, pasi Instituti Amerikan i Naftës raportoi se inventarët e naftës bruto ranë me 3 mln fuçi në javën që përfundoi më 25 Mars.
Investitorët mbyllën me shpejtësi pozicionet në sesionet e mëparshme, pasi Rusia premtoi të reduktojë operacionet ushtarake rreth Kievit.
Nga ana tjetër, Shtetet e Bashkuara dhe aleatët po planifikojnë sanksione të reja ndaj ekonomisë ruse. Një politikan i lartë rus paralajmëroi Bashkimin Europian se eksportet e naftës, drithrave, metaleve, fertilizuesve, qymyrit dhe drurit, do të kuotohen së shpejti në rubla.
Duke ndikuar gjithashtu tek oferta e tkurrur, prodhuesi e mëdhenj të naftës nuk ka gjasa të shtojnë kapacitetin sipër 400,000 fuçi në ditë, kur Organizata e Vendeve Eksportuese të Naftës, të takohet ditën e Enjte.
Arabia Saudite dhe Emiratet e Bashkuara Arabe, anëtarët kryesor të OPEC, deklaruan se grupi nuk do të ndërmarrë veprime kundër Rusisë për luftën në Ukrainë, pasi synimi është vetëm stabilizimi i tregut dhe jo politika.
Megjithatë, çmimet po përballen me presione edhe nga ngadalësimi i kërkesës në Kinë, si pasojë e masave të reja të karantinës për të frenuar Covid-19.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.