Nafta rritet lehtë – Ndikon rënia e rezervave në SHBA
Çmimet e naftës po qendrojnë në rritje të lehtë gjatë sesionit të sotëm, për shkak të të dhënave jo zyrtare në SHBA, që treguan një rënie të rezervave të naftës, gjatë javës që u mbyll më 1 qershor. Në këtë mënyrë, nafta është tërhequr lehtë nga niveli më i ulët në 2 muaj, të regjistruar në sesionin e kaluar. Gjithsesi, investitorët po presin të dhënat zyrtare mbi rezervat e naftës në SHBA, që publikohen më vonë gjatë ditës së sotme.
Ndërkohë, tre burime të afërta me OPEC deklaruan për Reuters se, qeveria amerikane në mënyrë jozyrtare i ka kërkuar Arabisë Saudite dhe disa vendeve të tjera, anëtare të kartelit, që të rrisin prodhimin. Nafta Bruto amerikane po tregtohet në rreth 65.2 dollarë për fuçi. Nafta Brent e Londrës po tregtohet në rreth 75.7 dollarë për fuçi, ndërsa në sesionin e kaluar, preku nivelin më të ulët që nga 8 maji.
Referuar të dhënave të Institutit Amerikan të Naftës, rezervat e naftës në SHBA ranë me 2 milionë fuçi, gjatë javës së kaluar, kundrejt parashikimeve të analistëve për një rënie prej 1.8 milionë fuçi. Ndërkohë, ministri rus i Energjisë, Alexander Novak, deklaroi se, kërkesa për naftë do të përcaktojë edhe politikat e ardhshme të këtij tregu. Reuters raporton se, mund të vendoset një rritje prej rreth 1 milionë fuçi në ditë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.