Nafta rritet lehtë – Ndikon rritja e aksioneve dhe rënia e dollarit
Çmimet e naftës po qëndrojnë në rritje të lehtë në sesionin e sotëm, pasi dollari amerikan ra në nivelin më të ulët në 3 vitet e fundit. Megjithatë, volumi i shkëmbimeve tregtare ka qenë i ulët për shkak se shumica e tregjeve aziatike kanë qëndruar pushim me rastin e Vitit të Ri hënor. Nafta Bruto amerikane po tregtohet në 61.4 dollarë për fuçi, ndërsa për të gjithë javën ka fituar rreth 4% të vlerës.
Nafta Brent e Londrës po tregtohet në rreth 64.5 dollarë për fuçi dhe gjatë kësaj jave pritet të publikojë fitime prej rreth 3%. Analistët shprehen se, nafta po gjen një mbështetje nga rimëkëmbja e aksioneve globale dhe nga dobësimi i dollarit amerikan, por këto fitime po limitohen nga rritja e prodhimit në SHBA. Dollari amerikan preku nivelin më të ulët në 3 vitet e fundit, në raport me shportën e monedhave ndërkombëtare.
Ndërkohë, prodhuesit e naftës të udhëhequr nga Arabia Saudite dhe Rusia synojnë të hartojnë një marrëveshje mbi një aleancë afatgjatë, deri në fund të këtij viti, deklaroi ministri i energjisë në Emiratet e Bashkuara Arabe. Deri më tani, OPEC, Rusia dhe nëntë prodhues të tjerë kanë ulur prodhimin me 1.8 milionë fuçi në ditë, në përpjekje për të rritur çmimet.
Në anën tjetër, janë vënë re shenja të rritjes së kërkesës në Azi. India importoi një nivel rekord, prej 4.93 milionë fuçi naftë në ditë, gjatë janarit. Megjithatë, rritja e prodhimit në SHBA po dëmton përpjekje e OPEC për të ulur rezervat globale të naftës, që përkthehet në rritje të çmimeve.
Lidon Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.