Nafta rritet ndjeshëm – Ndikon rënia e prodhimit në Venezuelë

Çmimet e naftës po realizojnë fitime të konsiderueshme në sesionin e sotëm, për shkak të rënies së eksporteve nga Venezuela, që është një vend anëtar i OPEC. Nafta Brent e Londrës po tregtohet në rreth 76.5 dollarë për fuçi, ndërsa nafta Bruto amerikane po tregtohet në rreth 65.4 dollarë për fuçi, pas rënies me 1.2% në sesionin e kaluar. Venezuela, që është anëtare e Organizatës së Vendeve Eksportuese të Naftës, është rreth 1 muaj prapa në transportimin e naftës bruto të konsumatorët, nga porti kryesor i këtij vendi.

Tankerat po presin për të ngarkuar më shumë se 24 milionë fuçi naftë, pothuajse aq sa kompania shtetërorë e naftës eksportoi gjatë muajit prill. Për shkak të kësaj situatë, kompania shtetërorë e naftës në Venezuelë ka deklaruar se mund ti lejojë konsumatorët të pezullojnë përkohësisht kontratat. Për këtë arsye, janë shtuar shanset që OPEC dhe Rusia të vendosin një rritje të prodhimit me rreth 1 milionë fuçi në ditë, gjatë takimit që zhvillohet në Vjenë më 22 qershor.

Gjithsesi, një zyrtar i qeverisë së Irakut, që gjithashtu është një vend anëtar i OPEC, deklaroi se rritja e prodhimit nuk ishte në tavolinën e diskutimeve, pasi tregu është i qendrueshëm dhe çmimet në nivele të kënaqshme. Në anën tjetër, prodhimi në SHBA preku një nivel të ri rekord, prej 10.8 milionë fuçi në ditë, gjatë javës që u mbyll më 1 qershor. Gjatë dy viteve të fundit, prodhimi në SHBA është rritur me 28%, ose me një mesatare prej 2.3% në muaj.

Rritja e prodhimit në ekonominë më të madhe në botë, ka bërë që diferenca mes dy bençmarkëve kryesorë të zgjerohet në rreth 10 dollarë, në favor të naftës Brent. Ndërkohë, rezervat e naftës bruto në SHBA u rritën me 2.1 milionë fuçi, gjatë javës së kaluar, në totalin e 436.6 milionë fuçive, referuar të dhënave të Administratës për Informimin mbi Energjinë.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.