Nafta ruse në Europë – Bien ndjeshëm dërgesat drejt kontinentit, rritet fluksi për Kinën
Rafineritë e naftës në Europë kanë marrë më pak naftë nga Rusia, ndërkohë që prodhuesi më i madh i energjisë në botë ka rritur dërgesat nëpërmjet tubacioneve drejt Kinës. Rusia do të dërgojë 19% më pak naftë nëpërmjet porteve kryesore në Baltik dhe detin e zi në 5 muajt e parë të 2018-ës krahasuar me një vit më parë, sipas planeve të dërgesave të marrë nga Bloomberg.
Ndërkohë, fluksi nëpërmjet tubacioneve drejt Kinës është rritur me 43% në tremujorin e parë, sipas të dhënave të fundit të operatorit shtetëror, Transneft.
Kjo do të bëjë që rafineritë në Europë të kërkojnë për një zëvendësues. Kontinenti importon më shumë naftë nga Rusia krahasuar me çdo vend tjetër. Për momentin, reduktimet e fluksit nga Rusia nuk po ndikojnë në rritjen e çmimeve, kryesisht prej punimeve të mirëmbajtjes në Europë, që kthejnë naftën në karburant.
Nafta ruse është tregtuar në nivelet më të ulëta në 4 vite në Europë, kryesisht prej mirëmbajtjes si dhe rritjes së fluksit nga Shtetet e Bashkuara. Megjithatë, mungesa e ngarkesave nga Rusia po ndihet në tregun e transportit, ndërkohë që pakti i uljes së prodhimit nga OPEC ka ulur gjithashtu sasinë e naftës që transportohet.
Kosto e transportit, që konsiston në lëvizjen e dërgesave të Rusisë nga porti kryesor në Detin e Zi drejt Mesdheut, arriti në një mesatare prej 1 dollarë për fuçi deri më tani për 2018-ën, që është norma më e ulët që prej vitit 2009.
Nga ana tjetër, fluksi total nëpërmjet tubacioneve drejt Kinës u rrit me 43% në rreth 750 mijë fuçi në ditë për tremujorin e parë. Sipas Transneft, dërgesat në Europë pritet të bien me 19% në 1.86 milionë fuçi në ditë deri në muajin Maj. Sipas analistëve, nafta ruse pritet të zëvendësohet me atë të Lindjes së Mesme dhe Shteteve të Bashkuara.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.