Nafta, sesioni i gjashtë në rënie – Prodhimi në SHBA rritet në 10.25 milionë fuçi në ditë
Çmimet e naftës po qëndrojnë në rënie për të gjashtin sesion me radhë dhe pritet të publikojnë humbjet më të mëdha javore në 10 muajt e fundit.
Rritja e prodhimit në nivel rekord në Shtetet e Bashkuara të Amerikës ra shtuar shqetësimet për një mbifurnizim të tregut global. Rënia vjen pavarësisht rimëkëmbjes së aksioneve.
Nafta Brent e Londrës po tregtohet në rreth 64.5 dollarë për fuçi, duke prekur nivelin më të ulët që nga 20 dhjetori. Nafta Bruto amerikane po tregtohet në rreth 60.7 dollarë për fuçi, niveli më i ulët që nga 2 janari.
Të dyja kontratat kanë rënë me më shumë se 9%, që nga niveli maksimal për këtë vit të regjistruar në janar, ndërsa për këtë javë rënia është mbi 6%. Pavarësisht rënies drastike, analistët mendojnë se tendenca e naftës do të vijojë të jetë sërish në rënie.
Referuar të dhënave, prodhimi i naftës në SHBA u rrit në një rekord prej 10.25 milionë fuçi, gjatë javës që u mbyll më 2 shkurt, njoftoi Administrata për Informimin mbi Energjinë.
Ndërkohë, vendi anëtar i OPEC, Irani, njoftoi planet për të rritur prodhimin, gjatë katër viteve të ardhshme, në një mesatare prej 700 mijë fuçi në ditë.
Tashmë, prodhimi amerikan pritet të tejkalojë Arabinë Saudite, që është prodhuesi më i madh i Organizatës së Vendeve Eksportuese të Naftës.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.