Nafta, sesioni i tretë në rritje – Çmimet mbështeten nga balancimi i tregut dhe FMN
Çmimet e naftës po qëndrojnë në rritje edhe në sesionin e sotëm, duke publikuar fitime për të tretin sesion me radhë, për shkak të shenjave se tregu po ribalancohet, pas 3 vitesh në mbifurnizim.
Për këtë arsye, edhe parashikimi për vitin 2018 tashmë është më i qartë. Nafta Bruto amerikane është rritur përmbi 51 dollarë për fuçi, ndërsa në sesionin e kaluar fitoi rreth 2% të vlerës.
Edhe nafta Brent e Londrës fitoi rreth 2% të vlerës në sesionin e kaluar, ndërsa sot po tregtohet pranë 57 dollarëve për fuçi. Tregtarët shprehen se, janë në pritje të të dhënave mbi rezervat e karburanteve në Shtetet e Bashkuara të Amerikës, që mund të përcaktojnë edhe drejtimin e tregut.
Çmimet janë mbështetur edhe nga të dhënat e Fondit Monetar Ndërkombëtar, që ka rishikuar në rritje parashikimin për ekonominë globale, në 3.6% për këtë vit dhe në 3.7% për vitin 2018.
Deri më tani për vitin 2017, nafta Brent ka pasur një çmim mesatar prej 52.7 dollarë për fuçi, ndërsa deri në fund të vitit parashikohet që çmimi mesatar të jetë rreth 53 dollarë.
Ndërsa, marrëveshja mes vendeve anëtare të OPEC dhe vendeve të tjera që nuk janë pjesë e organizatës, duke përfshirë edhe Rusinë, për uljen e prodhimit me 1.8 milionë fuçi në ditë, pritet të skadojë në mars të 2018. Por, vendet kryesore po zhvillojnë negociata për ta shtyrë këtë marrëveshje përtej kësaj date.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.