Nafta “tërhiqet” lehtë – Vëmendja, tek reagimi i OPEC ndaj nxjerrjes së rezervave nga SHBA
Nafta është tërhequr lehtë në ditën e Enjte, ndërkohë që investitorët po presin të shohin se si prodhuesit kryesorë do reagojnë ndaj nxjerrjes emergjente të naftës në treg nga SHBA dhe ekonomi të tjera të mëdha, për të zbutur çmimet. Nafta Brent ra me 7 cent në 82.18 dollarë për fuçi, ndërsa nafta bruto amerikane (WTI) ra me 19 cent apo 0.2% në 78.20 dollarë për fuçi. E gjithë vëmendja është kthyer tashmë tek Organizata e Vendeve Eksportuese të Naftës, përfshirë Rusinë dhe vendet aleate, që njihen si OPEC+, që do takohen në javën e ardhshme për të diskutuar mbi kërkesën dhe ofertën e naftës.
Analistët thonë se vendimi i guximshëm nga vendet konsumatore, i ka lënë derën hapur OPEC që të përshtasë politikat e ofertës në takimin e 2 Dhjetorit. Grupi ka shtuar 400,000 fuçi në ditë që prej Gushtit, duke zhbërë reduktimin e prodhimit që nisi vitin e kaluar, kur pandemia shkurtoi kërkesën. OPEC+ do takohet më 2 Dhjetor për të vendosur nëse do rrite prodhimi me 400,000 fuçi në ditë të tjera nga muaji Janar. Burime për Reuters thonë se OPEC nuk do diskutojë ndalimin e rritjes së prodhimit, pavarësisht vendimit të SHBA, Japonisë dhe Indisë për të nxjerrë rezervat emergjente në treg.
Çmimet e larta të naftës kanë shtuar presionet inflacioniste në botë. Banka gjigante e investimeve Goldman Sachs, vlerëson se nxjerrja e koordinuar e rezervave të naftës e drejtuar nga SHBA, mund të shtojë 70-80 milionë fuçi në tregje. Departamenti i energjisë në SHBA, ka nisur një ankand për të shitur 32 milionë fuçi nga rezervat strategjike të naftës, për dërgesë në fund të Dhjetorit deri në Prill 2022, ndjekur nga 18 milionë fuçi të tjera së shpejti. Tregtarët po presin gjithashtu nëse Kina do të ndjekë me rezervat e veta.
Klevis Llaha / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.