Nafta “tërhiqet” në tregtinë e parë të Shkurtit – Investitorët marrin fitimet. Shqetësimet mbi ofertën limitojnë humbjet
Çmimet e naftës janë ngadalësuar në tregtinë e së Mërkurës, duke lënë pas rritjet më herët gjatë sesionit, ndërkohë që investitorët mbyllën pozicionet për të marrë fitim. Megjithatë, pritshmëritë se oferta do të qëndrojë e tkurrur, ndërkohë që OPEC po has vështirësi të rrisë prodhimin, dhe rimëkëmbja e qëndrueshme e kërkesës pas pandemisë, kanë limituar humbjet. Nafta brent, çmimi referencë në bursën e Londrës, ra me 0.1% në 89.16 dollarë për fuçi, pasi preku 91.21 dollarë në tregtinë e së Hënës.
Nafta bruto amerikane, (WTI) ra me 0.1% në 88.09 dollarë për fuçi, pasi arriti 88.57 dollarë në sesionin e mëparshëm. Ditën e premte, të dy kontratat u rritën në nivelin më të lartë që prej Tetorit 2014, në 91.7 dhe 88.8 dollarë në mënyrë respektive. Për Janarin e plotë, nafta është rritur me rreth 17%, që është rritja më e madhe mujore që prej Shkurtit 2021, nxitur nga mungesa e furnizimeve dhe pasiguritë politike në Europë dhe Lindjen e Mesme. Sipas analistëve, vëmendja do të jetë tek vendimi i OPEC dhe zhvillimet në Ukrainë. Tregtarët presin gjerësisht që Organizata e Vendeve Eksportuese e Naftës të mbajë premtimin e rritjeve graduale të prodhimit në takimin e ditës së Mërkurë.
Megjithatë, prodhimi i naftës nga OPEC në muajin Janar dështoi të arrijë objektivin e rritur, ç’ka vë në dukje se prodhuesit po hasin vështirësi në kapacitet, edhe me çmime tërheqëse në treg. Tensionet mes Rusisë dhe Perëndimit kanë nxitur gjithashtu çmimet. Rusia, prodhuesi i dytë më i madh në botë i naftës, dhe Perëndimi, janë përplasur mbi mbledhjen e trupave rus pranë Ukrainës, duke rritur shqetësimet se furnizimet e energjisë në Europë mund të ndërprehen. SHBA dhe Britania janë përgatitur për të ndëshkuar elitën e Rusisë me ngrirje të aktiveve dhe ndalime të udhëtimeve nëse Rusia hyn në Ukrainë.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.