Nafta “tërhiqet” nga niveli i lartë 7-vjeçar – Rinisin bisedimet SHBA-Iran, që mund të rikthejnë furnizimet e vendit

Nafta është ngadalësuar në tregtinë e së Martës, përpara rinisjes së bisedimeve indirekte mes SHBA dhe Iranit, që mund të rikthejnë marrëveshjen bërthamore dhe të heqin sanksionet ndaj eksporteve të naftës të vendit.  Nafta brent, çmimi referencë në bursën e Londrës ra me 0.24% në 92.47 dollarë për fuçi, pasi shënoi nivelin më të lartë në 7 vite prej 94 dollarë në ditën e hënë.  Nata bruto amerikane ra me 0.16% në 91.18 dollarë për fuçi. Të dy kontratat kanë prekur nivelin më të lartë që prej Tetorit 2014, mbështetur nga kërkesa e fortë botërore, tensionet në Lindje të Europës dhe ndërprerjet në ofertë si pasojë e motit të keq në SHBA.

Bisedimet mbi rikthimin e marrëveshjes bërthamore të Iranit të vitit 2015, që po zhvillohen në Vienë, do të rinisin sot pas një ndalese 10-ditore. SHBA kanë hequr një pjesë të sanksioneve, ndërsa irani po kërkon heqjen e plotë dhe një garanci nga SHBA që nuk do ketë më masa ndëshkuese.  Ndërkohë që optimizmi mbi bisedimet SHBA-Iran ka bërë disa investitorë të ndalojnë investimet për të marrë fitimin, çmimet e dobëta ka gjasa të jenë të përkohëshme, ndërkohë që analistët thonë se tregu qëndron në deficit të ofertës.  Në SHBA, rafineritë në Teksas ndaluan prodhimin, prej temperaturave të ftohta që përfshin të gjithë gjirin.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.