Nafta tregtohet e qëndrueshme – Të shtunën në kryeqytet çmimet ishin të pandryshuara!

Çmimet e naftës në pikat e shitjes me pakicë kanë mbetur të pandryshuara të shtunën në të njëjtin nivel të një dite më parë, kur u regjistrua edhe ulja më e madhe krahasuar me të premten me 20 lekë për litër. Ndërkaq, në raport me të martën, ku u shënua edhe çmimi rekord prej 269 lekë/litër, ulja e çmimit është edhe më e madhe.

Nëpërmjet një postimi në rrjetet sociale, kryeministri Edi Rama ka njoftuar ngritjen e Bordit Kombëtar të Administrimit të Karburantit. Sipas kreut të Ekzekutivit, çmimet tashmë do të kalojnë në filtrin e transparencës, për të mos lejuar asnjë abuzim në kurriz të qytetarëve dhe marzhi i fitimit do të ngrijë sepse kjo nuk është kohë për të nxjerrë fitime, po për të rezistuar të gjithë së bashku, ju uroj një fundjavë të mbarë.

Ndërkohë, në tregjet botërore çmimet e naftës kanë regjistruar rritje të premten, por shënuan rënien e tyre më të madhe javore që nga nëntori, pasi tregtarët vlerësuan përmirësime të mundshme në perspektivën e furnizimit që është ndërprerë nga pushtimi rus i Ukrainës.

Çmimet e naftës së papërpunuar janë rritur që nga pushtimi, të cilin Moska e quan një “operacion special ushtarak”. Këtë javë, standardet e të ardhmes arritën nivelet e tyre më të larta që nga viti 2008, më pas u tërhoqën ndjeshëm pasi disa vende prodhuese sinjalizuan se mund të rrisin furnizimin.

Të premten, shqetësimet për furnizimin u rritën kur bisedimet për të ringjallur marrëveshjen bërthamore të Iranit të vitit 2015 u përballën me kërcënimin e kolapsit pasi një kërkesë ruse e minutës së fundit i detyroi fuqitë botërore të ndalonin negociatat.

Nafta Brent, çmimi referencë në bursën e Londrës, u rrit me 3,34 dollarë, ose 3,1%, të premten në mbyllje të tregtimit, duke u shitur me 112,67 dollarë për fuçi, pasi arriti në tregtimin më të ulët prej 107,13 dollarësh. Nafta bruto amerikane u rrit me 3,31 dollarë, ose 3,1%, duke u tregtuar me 109,33 dollarë për fuçi, nga niveli i ulët i seancës prej 104,48 dollarësh.

Javën e ardhshme, fokusi do të zhvendoset në raportet e tregut të naftës nga Administrata Ndërkombëtare e Energjisë (IEA) dhe Organizata e Vendeve Eksportuese të Naftës (OPEC). Të dy këto organizata kanë treguar se tregu duhet të jetë i mbifurnizuar këtë vit.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.