Nafta vazhdon rritjen – Çmimet rriten me mbi 1.5% prej zbutjes së shqetësimeve për Omicron

Nafta ka vazhduar rritjen pas një rimëkëmbjeje prej rreth 5% në sesionin e mëparshëm tregtar, ndërkohë që shqetësimet mbi ndikimin e variantit Omicron ndaj kërkesës botërore për karburant u zbutën dhe bisedimet bërthamore me Iranin ngecën, duke vonuar rikthimin e eksporteve të naftës nga vendi. Nafta Brent e Londrës u rrit me 1.12 dollarë apo 1.5% në 74.2 dollarë për fuçi, pasi shënoi një rritje me 4.6% ditën e Hënë. Nafta Bruto Amerikane, qëndronte në 70.71 dollarë për fuçi, në rritje me 1.22 dollarë apo 1.8%, pasi u rimëkëmb me 4.9% në tregtinë e kaluar.

Çmimet u fundosën javën e kaluar prej shqetësimeve se vaksinat mund të jenë më pak efektive ndaj Omicron, ç’ka rriti frikën se qeveritë mund të rivendosin masa të karantinës. Megjithatë, zyrtarët në Arabinë Saudite raportuan gjatë fundjavës se rastet me Oimcron atje kanë shfaqur simptoma të lehta dhe eksperti i lartë i sëmundjeve infektive në SHBA, Anthony Fauci, tha se nuk duket që varianti ka një shkallë më të madhe të ashpërsisë. Në një tjetër shenjë besimi për kërkesën e naftës, prodhuesi kryesor Arabia Saudite, rriti cmimet mujore ditën e Diel.

Kjo vjen pasi Organizata e vendeve Eksportuese të Naftës, së bashku me aleatë si Rusia, që njihen si OPEC+, ranë dakord të vazhdojnë rritjen e prodhimit me 400,000 fuçi në ditë në Janar, pavarësisht nxjerrjes së rezervave strategjike nga SHBA.  Përveç kësaj, vonesa e rikthimit të naftës iraniane në treg ka mbështetur çmimet. Bisedimet indirekte mes Iranit dhe SHBA arritën në një ndalesë dhe Gjermania i bëri thirrje vendit që të paraqesë propozime realiste në bisedimet për programin bërthamor.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.