Nafta zgjeron fitimet, pavarësisht variantit Delta / Mbështetet nga rënia e rezervave në SHBA. Investitorët presin takimin e OPEC+
Nafta po qëndron në rritje në sesionin e sotëm, pasi të dhënat e industrisë në SHBA treguan një rënie të rezervave, gjatë javës së kaluar. Megjithatë, investitorët janë të shqetësuar për rritjen e infektimeve me Covid-19 në disa vende të botës. Nafta Brent e Londrës po tregtohet në rreth 75 dollarë për fuçi, ndërsa nafta Bruto amerikane po tregtohet në rreth 73.5 dollarë për fuçi. Ndërkohë që infektimet me variantin Delta të koronavirusit kanë detyruar shumë vende, nga Portugalia në Australi, të vendosin masa kufizuese, shpresat për rimëkëmbjen e kërkesës nuk kanë ndryshuar. Në ditën e fundit të qershorit, Brenti i Londrës po i drejtohet një tjetër muaji në rritje, që do të thotë se kontrata ka publikuar fitime për të gjashtin muaj me radhë. Referuar të dhënave në SHBA nga Instituti Amerikan i Naftës, rezervat e naftës bruto ranë me 8.2 milionë fuçi, gjatë javës së kaluar. Në anën tjetër, rezervat e benzinës u rritën me 2.8 milionë fuçi. Gjithsesi, shpresat për një rimëkëmbje të shpejtë të kërkesës morën një mbështetje nga sekretari i Përgjithshëm i OPEC, Mohammad Barkindo, i cili tha se kërkesa parashikohet të rritet me 6 milionë fuçi në ditë, gjatë vitit 2021. Deklarata e Barkindo u bë përpara takimit të OPEC+, që zhvillohet të enjten, ku do të përcaktohen politikat e prodhimit në të ardhmen. Analistët parashikojnë se grupi do të vendosë një rritje të prodhimit me të paktën 500 mijë fuçi, duke filluar nga muaji gusht.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.